478 views 0 secs 1 comments

بے خودی

In ادب
December 27, 2020

تیرا ملنا، بچھڑ جانا، سبھی کچھ عارضی ٹھہرا
وہ اک لمحہ،  ملے جب دل،  وہی بس قیمتی ٹھہرا

سمندر تھا وہیں موجود، صحرا بھی وہیں ٹھہرا
محبت میں کوئی چھاوں تو کوئی دھوپ میں ٹھہرا

کسی نے بھیک میں مانگی محبت شاہ ہو کر بھی
کسی نے بخش دی چاہت کسی کو اور سخی ٹھہرا

کسی نے کی بہت کوشش، مگر نہ بن سکا نایاب
کسی  کا  پیار  سے  تکنا  ہی  اکثر  شاعری  ٹھہرا

کسی  کا  لاج  سے نظریں جھکانا کج ادا سمجھے
کسی کا  ہاتھ  ذلفوں  میں  چلانا  سادگی  ٹھہرا

کوئی مجنوں،  کوئی رانجھا،  کوئی فرہاد کہلایا
کوئی  عشق  حقیقی  پا  گیا اور  پھر،  ولی ٹھہرا

کسی  نے  اپنی  چاہت  سے  فراق  یار کو جھیلا
کسی  کا  جان  سے جانا بھی یارو! سرسری  ٹھہرا

کوئی  جلتا   رہا   ہر  دم   وصال  یار  کی  خاطر
کسی  کا  عمر  بھر  نظریں  چرانا  عاشقی  ٹھہرا

ہر اک  نا عاقبت اندیش  کو  پہنچا  سکون قلب
ہر اک مخلص کا یوں در در بھٹکنا تشنگی ٹھہرا

کوئی کم ظرف  بازی  لے  گیا  گمراہ  کر  کے بھی
کسی راغب کے سچے دل کا جذبہ بے خودی ٹھہرا

زین الاسلام (راغب)

One comment on “بے خودی
    Nimra

    کچھ اشعار ہمیشہ آپکے زہن میں نقش ہو جاتے ہیں آپکی یہ غزل ایسے ہی میرے زہن میں ہمیشہ نقش رہے گی ۔۔۔۔

Leave a Reply