مجھے کس طرح سے یقین ہو جو امام تھے وہ گزر گئے
وہ جو جوش تھا وہ نہیں رہا جو نِظام تھے وہ گزر گئے
کبھی دام و زر بھی غلام تھے، ابھی دام و زر کے غلام ہیں
اے عزیز! دورِ جدید ہے جو غلام تھے وہ گزر گئے
مرے دشمنوں کو خبر کرو کہ وہ چھپ سکیں تو چھپیں ذرا
سبھی آندھیاں ہیں گزر چکیں، جو مہام تھے وہ گزر گئے
ہمیں زندگی تھی ملی کبھی، وہیں غفلتوں میں گزار دی
یہ بتانے والے بتائیں گے جو خِیام تھے وہ گزر گئے
میں ہَرا ہوا تو چلا گیا، کہ جی لوٹ آؤں گا پھر کبھی
یہ خبر ملی ہے کہ لوگ جو مرے نام تھے وہ گزر گئے
یہاں دفعتاً جو اجڑ گیا وہی پیڑ ہوں میں اے دوستا
مری زندگی، مرے دن یہاں جو تمام تھے، وہ گزر گئے
یہاں صورتوں کا ہی فرق ہے وہ بنانے والا تو ایک ہے
یوں سفید پوشی خدا ہوی، سیہ فام تھے، وہ گزر گئے
میاں محمد زین العابدین
